O‘zbekiston yoshlar terma jamoasi va Rossiyaning "Rubin” klubi futbolchisi Bobur Davlatovga Angliya futbol assotsiatsiyasi (AFA) Angliya terma jamoasi safida maydonga tushish uchun ingliz klublaridan biriga o‘tish va maydonga tushish haqida rasmiy taklif bildirdi. Bu haqda Championat.asia internet-nashri xabar bermoqda.

"Agar Bobur Davlatov ayni vaqtda Angliya klublaridan biriga o‘tsa, u Angliya fuqoroligini qabul qilishi shart bo‘ladi. Undan so‘ng Davlatov kelajakda terma jamoa uchun maydonga tushishni istasa birinchi navbatda Angliya varianti ko‘rib chiqiladi. AFAning ushbu taklifini Davlatovlar oilasi qabul qilmagan”, — deb yozadi"Kun”.

Eslatib o‘tamiz, Bobur Davlatov 1996-yilning 1-mart kuni tavallud topgan. FIFA reglamenti bo‘yicha 18 yoshgacha bo‘lgan futbolchilar ikki tomonning roziligi bilan o‘z terma jamoalarini o‘zgartirish huquqiga ega. Davlatov esa aynan 18 yoshga to‘lgunicha berilgan taklifga rad javobini bergan.

Ma’lumot uchun: Bobur Davlatov 1994-yilda tug‘ilgan O‘zbekiston o‘smirlar terma jamoasi safida 2011-yili Meksikada bo‘lib o‘tgan jahon chempionati bahslarida ishtirok etib, chorak finalga qadar yetib borgan. Hozirgi vaqtda Davlatov 1995-yilda tug‘ilgan futbolchilardan iborat O‘zbekiston yoshlar terma jamoasi yetakchilaridan biri hisoblanadi.